Dastuurka JFS (A Citizen’s Initiative)
Home Constitution Blog Authors
CUTUBKA 5: NIDAAMKA FEDERAALKA IYO BAAHSANAANTA AWOODDA JAMHUURIYADDA FEDERAALKA SOOMAALIYA
(CHAPTER 5: THE FEDERAL SYSTEM AND DISTRIBUTION OF POWERS OF THE FEDERAL REPUBLIC OF SOMALIA)
Madaxa Koowaad: Qaabdhismeedka Dawladda
Somali (Original)

Qodobka 63aad: Maqaamka Caasimadda iyo Matalaadda Gobolka Banaadir

(1) Maamulka Caasimadda Jamhuuriyadda Federaalka Soomaaliya waxa uu yeelanayaa golaha Caasimadda, gole fulin iyo garsoor.

(2) Golaha Caasimadda oo ku salaysan matalaadda shacabka caasimadda waxaa laga soo dooranayaa degmooyinka Gobolka Banaadir.

(3) Duqa Caasimadda iyo kuxigennadiisa waxaa dooranaya golaha Caasimadda. Duqa Caasimaddu waxa uu magacaabayaa xoghayeyaal.

(4) Gobolka Banaadir waxa uu yeelanayaa xildhibaanno ku matala Golaha Aqalka Sare ee Baarlamaanka Federaalka Soomaaliya, si la mid ah gobollada kale ee dalka.

(5) Dawladda Federaalka Soomaaliya waxa ay mas'uul ka tahay arrimaha amniga iyo siyaasadda ee Caasimadda Jamhuuriyadda iyo arrimaha kale ee uu jideeyey xeer uu soo saaro Baarlamaanka Federaalka Soomaaliya.

(6) Dawladda Federaalka Soomaaliya waxa ay soo magacaabaysaa mas'uul sare oo wakiil uga noqda waajibaadkeeda la xiriira arrimaha Caasimadda iyo Gobolka Banaadir.

(7) Marka laga reebo arrimaha ku xusan fagradda Saad ee godobkan iyo arrimaha kale ee xeerarka dalka si kale loogu qeexay, Caasimadda Jamhuuriyadda waxay leedahay awoodaha ku xusan Jadwalka Labaad (C) ee Dastuurka.

(8) Baarlamaanka Federaalka Soomaaliya ayaa soo saaraya xeer gaar ah oo lagu nidaamiyo arrimaha la xiriira Caasimadda iyo Gobolka Banaadir, wadashaqaynta İyo xilka iyo waajibaadka ka dhaxeeya Dawladda Federaalka Soomaaliya iyo Caasimadda/Gobolka Banaadir.

English

No translation available yet in English.

Plain-Language Explanation

Somali
Maamulka Caasimadda Soomaaliya wuxuu ka koobnaanayaa Golaha Caasimadda, gole fulineed iyo garsoor. Golaha Caasimadda waxaa si toos ah uga soo dooranaya shacabka degmooyinka Gobolka Banaadir, halka Duqa Caasimadda iyo ku-xigeennadiisa ay dooranayaan xubnaha Golaha Caasimadda. Duqu wuxuu sidoo kale magacaabayaa xoghayeyaasha maamulka. Gobolka Banaadir wuxuu yeelanayaa wakiillo ku matala Golaha Aqalka Sare ee Baarlamaanka Federaalka Soomaaliya, si la mid ah gobollada kale ee dalka. Dowladda Federaalka ayaa mas’uul ka ah amniga, siyaasadda iyo waajibaadka kale ee la xiriira Caasimadda ee sharcigu u xilsaaro. Waxay sidoo kale magacaabaysaa mas’uul sare oo u qaabilsan xiriirinta iyo gudashada waajibaadka Dowladda Federaalka ee Caasimadda iyo Gobolka Banaadir. Caasimaddu waxay yeelanaysaa awoodaha maamul ee Dastuurka iyo shuruucdu u oggol yihiin, marka laga reebo arrimaha uu Dastuurku si gaar ah ugu xilsaaray Dowladda Federaalka. Baarlamaanka Federaalka ayaa soo saaraya sharci gaar ah oo qeexaya maamulka Caasimadda iyo Gobolka Banaadir, awoodaha ay leeyihiin, iyo sida ay ula shaqaynayaan Dowladda Federaalka.
English

Not available.

Questions & Comments (0)