(1) Golaha Shacabka iyo Golaha Aqalka Sare waxay wada yeelanayaan kulammo wadajir ah markii loo baahdo si waafaqsan Dastuurka iyo xeerarka kale ee Jamhuuriyadda Federaalka Soomaaliya.

(2) Kulammada wadajirka ah ee labada gole ee Baarlamaanka Federaalka waxaa shirguddoominaya Guddoomiyaha Golaha Shacabka; marka uu mağanyahayna waxaa shirguddoominaya Guddoomiyaha Golaha Aqalka Sare. Haddii ay labadooduba maqanyihiin waxaa shirguddoominaya guddoomiye kuxigeenka koowaad ee Golaha Shacabka si waafaqsan xeer hoosaadka wadajirka ah ee Baarlamaanka Federaalka.

(3) Go'aannada kulanka wadajirka ah ee labada gole waxay ku ansaxayaan in ugu yaraan aqlabiyad hal dheeri ah tirada guud ee xubnaha gole walba ay goobjoog yihiin oo codaynaya, haddii aan Dastuurku si kale u dhigin.

(4) Marxaladda codaynta, shirguddoomiyaha kulanka wadajirka ah ma codaynayo, marka laga reebo haddii codadku barbardhac noqdaan. Xaaladdaas keliya ayuu codkiisa dhliban karaa, dhankii codkiisu maro ayayna aqlabiyaddu raaceysaa.

(5) Kulammada wadajirka ah waxaa loo gabanayaa arrimaha ay ka mid yihiin: (a) Doorashada Madaxweynaha Jamhuuriyadda Federaalka Soomaaliya; (b) Eedaynta iyo maamuus kaxayuubinta Madaxweynaha Jamhuuriyadda Federaalka Soomaaliya; (c) Miisaaniyad sanadeedka iyo xisaabxirka; (d) Furitaanka rasmiga ah ee kalfadhiyada baarlamaanka ee Madaxweynaha Jamhuuriyadda Federaalka sanadkiiba hal mar; (e) Wax-kabeddel kasta ee Dastuurka Federaalka; iyo (f) Ansixinta xaaladaha degdegga ah iyo xaaladaha dagaalka.

(6) Iyada oo aan wax loo dhimayn awoodda uu baarlamaanku ku gudanayo waajibaadkiisa shaqo, Madaxweynaha Jamhuuriyadda Federaalka, haddii uu lagama maarmaan u arko, wuxuu guddoonka labada gole ka codsan karaa in la qabto fadhi wadajir ah.

(7) Xeer hoosaadka wadajirka ah ee Baarlamaanka Federaalka ayaa xeerinaya habraacyada kulammada wadajirka ah ee labada Gole ee Baarlamaanka Federaalka Soomaaliya.