(1) Dhammaan heerarka dawladeed ee Jamhuuriyadda Federaalka Soomaaliya waa in ay dhawraan, una hoggaansamaan Dastuurka Federaalka, iyaga oo aan isasiinayn awood ka baxsan midda uu Dastuurka Federaalka u asteeyay.

(2) Heer kasta oo dawladeed, ha ahaadeen heerar siman ama kuwo kala sarreeya, waa in ay yeeshaan xiriir iskaashi oo wanaagsan.

(3) Heer kasta oo dawladeed waa in uu tigeliyaa, ilaaliyaana xadka awoodaha loo asteeyay iyo awoodaha ay leeyihiin heerarka kale ee dawladda, waana in uu: (a) La yeeshaa heerarka kale ee dawladda xurmayn iyo xiriir walaaltinimo oo waxku-ool ah, kana shageeyaa midnimada iyo wadajirka shacabka; (b) Ku wargeliyaa hay'adaha kale siyaasadaha iyo hawlaha uu ka fulinayo degaannadooda kuwaas oo saamayn ku yeelan kara degaannada heerarka kale; İyo (c) Dejiyo siyaasado u adeegaya qorsheynta iyo hirgelinta mashaariicda horumarineed oo wadajir ah.

(4) Si loo xaqiijiyo jiritaanka iyo horumarinta xiriirka iskaashi ee Dawladda Federaalka iyo dawlad goboleedyada, waa in la joogteeyo wadashaqeyn wanaagsan si sare loogu qaado: (a) Xoojinta midnimada qaranka; (b) Amniga iyo nabadda; (c) Horumarinta dhaqandhaqaale ee qaranka iyo siyaasadaha ganacsiga ee dalka; (d) Kor u qaadidda daryeelka iyo horumarinta dhaqaalaha dadka; (e) Wadaagidda xogta ee heerarka kala duwan ee dawladda; iyo (f) Dejinta siyaasadaha iyo halbeegyada federaalka iyo dhaqangelintooda ee la xiriira awoodaha wadaagga ah.

(5) Baarlamaanka Federaalka ayaa soo saaraya xeer qeexaya dhisidda hay'ado iyo dejinta habraacyo fududeynaya wadashaqeynta heerarka kala duwan ee dawladda.