(1) Sida Diinta Islaamku qabto, caddaaladdu waxay ku jirtaa isudheellitirnaanta xuquuqda iyo waajibaadka.

(2) Muwaaddin kasta ee Jamhuuriyadda Federaalka Soomaaliya waxaa waajib ku ah inuu u hoggaansamo arrimaha soo socda: (a) Noqdo waddani daacad u ah horumarinta iyo wanaagga dalkiisa; (b) Difaaco ilaaliyana diinta, dalka, dadka iyo karaamada aadanaha. (c) Adkeeyo midnimada qaranka, isaga oo kaashanaya muwaaddiniinta kale; (d) Horumariyo mas'uuliyadda waalidnimo; (e) Barto aasaasiyaadka diinta Islaamka; (f) Si buuxda u barto, u xurmeeyo, ku dhaqmo, u hoggaansamo, difaacaana Dastuurka iyo xeerarka kale ee Jamhuuriyadda Federaalka Soomaaliya; (g) Horumariyo mabda'a islaxisaabtanka iyo sarraynta sharciga; (h) Bixiyo canshuurta si waafaqsan xeerarka Jamhuuriyadda Federaalka Soomaaliya; (i) Ka qaybqaato hawlaha waxtarka u leh muwaaddinka, qoyska, wanaagga guud iyo in uu ka qaybqaato horumarinta qaranka iyo bulshada uu la noolyahay; (j) Ka ilaaliyo deegaanka wasakhda iyo waxyeellada aan loo baahnayn; (k) Dhawro xuquuqda xayawaanaadka Jamhuuriyadda Federaalka Soomaaliya; iyo (l) Inuu codeeyo doorashooyinka.

(3) Marka la fasirayo waajibaadka ku xusan faqradda 2aad ee qodobkan laguma xaddidi karo xuquuqda aasaasiga ah ee ku xusan cutubkan.