Qodobka 192aad: Guddiga La Socodka Dib-u-eegista iyo Hirgelinta Dastuurka
(1) Guddiga la socodka wuxuu ka koobanyahay: (a) Shan (5) xubnood oo uu dooranayo Golaha Shacabka; (b) Shan (5) xubnood oo uu dooranayo Golaha Aqalka Sare; (c) Hal (1) ergay oo uu soo dooranayo dawlad goboleed kasta; iyo (d) Hal (1) ergay oo uu soo dooranayo Golaha Caasimadda Jamhuuriyadda.
(2) Xubnaha guddiga la socodka waxay iska dhexdooranayaan guddoonkooda.
(3) Guddiga la socodka wuxuu korjoogteynayaa jiheynayaana hawlaha hirgelinta Dastuurka asagoo ka helaya taageero farsamo Guddiga Madaxabannaan ee Dib-u-eegista iyo Hirgelinta Dastuurka arrimaha la xiriira in dastuurrada dawlad goboleedyada la waafajiyo Dastuurka Federaalka.
(4) Guddiga la socodka wuxuu u xilsaarayaa guddiga madaxabannaan ee Dastuurka diyaarinta soojeedimaha wax-kabeddelka Dastuurka haddii loo baahdo, si waafaqsan Qodobka 189aad ee Dastuurka, ka hor aftida dadweynaha ee Dastuurka.
(5) Guddiga la socodka wuxuu u diri karaa guddiga madaxabannaan ee Dastuurka cilmibaarisyo iyo warbixinno la xiriira hawsha waafajinta dastuurrada dawlad goboleedyada Dastuurka Federaalka, Guddiga Madaxabannaan ee Dib-u-eegista iyo Hirgelinta Dastuurka.
(6) Guddiga la socodka wuxuu warbixin ka siinayaa labada gole ee baarlamaanka iyo goleyaasha wakiillada horumarka laga sameeyay waafajinta dastuurrada dawlad goboleedyada ee Dastuurka Federaalka.
(7) Guddiga la socodka wuxuu korjoogteynayaa diyaarinta soojeedinta waafajinta oo ku saabsan dastuurka dawlad goboleed kasta, muddo shan (5) sano gudahood ah laga billaabo taariikhda uu Dastuurkan dhaqangalo.
(8) Dastuurrada dawlad goboleedyada ee dib-u-eegista lagu sameeyey si waafaqsan qodobkan waa in loo gudbiyaa Maxkamadda Dastuurka si ay u xaqiijiso waafaqsanaantooda ka hor inta aysan dhaqangelin.
(9) Khilaaf kasta oo ka dhasha habraaca waafajinta waxaa go’aan kamadambays ah ka gaaraysa Maxkamadda Dastuurka.
No translation available yet in English.
Plain-Language Explanation
Not available.
