Qodobka 189aad: Habraaca Wax-kabeddelka Dastuurka
(1) Dastuurkan waxaa wax looga beddeli karaa oo keliya si waafaqsan habraacyada ku xusan cutubkan.
(2) Wax-kabeddelka qodob ama qayb ka mid ah Dastuurka waxaa soojeedin kara: (a) Saddex meelood meel (1/3) tirada guud ee xubnaha Golaha Shacabka ama Golaha Aqalka Sare; (b) Golaha wasiirrada; (c) Ugu yaraan mid ka mid ah dawlad goboleedyada; (d) Madaxda fulinta ee heer federaal iyo heer dawlad goboleed oo ku heshiiya in qodob ama arrimaha ku xusan Jadwalka Labaad lagu sameeyo wax-kabeddel; ama (e) Codsi ay saxiixeen ugu yaraan 15,000 codbixiyaal diiwaangashan ee Jamhuuriyadda Federaalka Soomaaliya.
(3) Waxaa waajib ah in soojeedinta wax-kabeddelka Dastuurku ay sababaysan tahay isla markaana ay saxiixaan dhinacyada soo gudbiyay.
(4) Wax-kabeddelka qodob ama qodobbada Dastuurka oo uu soojeediyay dawlad goboleed ee ku xusan faqradda 2aad xafarkeeda (c) ee qodobkan, inta aan la horgayn Baarlamaanka Federaalka, waa in marka hore loo gudbiyaa golaha wakiillada dawlad goboleedka soojeediyay ayna ku oggolaadaan soojeedintaas aqlabiyad boqolkiiba konton iyo hal dheeri (50%+1) ah.
(5) Wax-kabeddelka ku yimaada heshiis siyaasadeed ee u dhexeeya madaxda fulinta ee heer federaal iyo heer dawlad goboleed, ee ku xusan faqradda 2aad xafarkeeda (d) ee qodobkan, waa in heshiiskaas ay wada saxiixaan dhammaan madaxda fulinta dawlad goboleedyada iyo madaxda fulinta ee heer federaal, haddii heshiiskaas uu la xiriiro Jadwalka Labaad ee astaynta awoodaha, wuxuu heshiiskaas ku ansaxayaa oggolaanshaha aqlabiyad boqolkiiba konton iyo hal dheeri (50%+1) ah ee labada gole ee Baarlamaanka Federaalka, balse haddii uu la xiriiro qodob ka mid ah Dastuurkan, heshiiskaas waxaa la raacayaa habraaca ku xusan faqradda 9aad ee qodobkan.
(6) Lama oggola soojeedinta wax-kabeddelid kasta oo saamaynaya ujeeddooyinka iyo nuxurka muhiimka ah ee la xiriira mabaadi'da aasaasiga ah ee Jamhuuriyadda Federaalka Soomaaliya sida ku cad Qodobbada 1aad, 2aad, 3aad iyo 4aad ee Dastuurka Jamhuuriyadda Federaalka Soomaaliya.
(7) Waa in gole kasta oo ka tirsan Baarlamaanka Federaalka Soomaaliya uu ku ansixiyaa soojeedinta wax-kabeddelka Dastuurka boqolkiiba konton hal dheeri (50%+1) ah ee gole kasta inta aan la billaabin doodda wax-kabeddelka Dastuurka.
(8) Baarlamaanka Federaalka Soomaaliya waa in uu xaqiijiyaa in la sameeyey latashiyo, marka la diyaarinayo soojeedinta, si waafaqsan cutubkan.
(9) Wax-kabeddelka qodob ama qodobbada Dastuurka waxay ku ansaxaysaa, marka uu gole kasta ee Baarlamaanka Federaalku ku ansixiyo saddex meelood labo meel (2/3) tirada guud ee xubnaha gole walba.
(10) Haddii Baarlamaanka Federaalka uu laalo soojeedinta wax-kabeddelka Dastuurka, waxaa reebban in soojeedintaas dib loogu soo celiyo ilaa ay ka soo wareegto muddo hal sano iyo bar ah.
(11) Marka labada gole ee Baarlamaanka Federaalku uu ansixiyo soojeedinta wax-kabeddelka Dastuurka ayna Maxkamadda Dastuurka xaqiijiso ansaxnimada wax-kabeddelka Dastuurka, waxaa xeer madaxweyne ku meelmarinaya Madaxweynaha Jamhuuriyadda Federaalka Soomaaliya.
No translation available yet in English.
Plain-Language Explanation
Not available.
