Qodobka 185aad: Mabaadi’da Hay’adaha Amniga iyo Difaaca Qaranka
(1) Waa in xubnaha hay’adaha amniga iyo difaaca ay dhawraan markey gudanayaan waajibaadkooda mabaadi’da soo socota: (a) Ilaalinta iyo ku dhaqanka Dastuurka Jamhuuriyadda Federaalka Soomaaliya; (b) Dhawridda talinta sharciga, hay’adaha dimuqraadiga ah iyo ilaalinta xuquuqda aasaasiga ee muwaaddinka; (c) Mihnadda ciidannimo, anshaxwanaag iyo waddaniyad; (d) Daahfurnaanta iyo oggolaanshaha la xisaabtanka hay’adaha rayidka ah ee u xilsaaran; (e) Dhexdhexaadnimo iyaga oo aan ku milmaynin arrimaha siyaasadda una hoggaansamaya oo keliya Dastuurka iyo xeerarka kale ee Jamhuuriyadda Federaalka Soomaaliya; iyo (f) Adkaynta wadaniyadda, iskutiirsanaanta, istaakulaynta iyo midnimada ummadda Soomaaliyeed.
(2) Xubnaha hay’adaha amniga iyo difaaca waa in lagu tababbaraa wadaniyad, asluub wanaag, tixgelinta iyo u hoggaansamidda Dastuurka iyo xeerarka kale ee Jamhuuriyadda Federaalka Soomaaliya.
(3) Muwaaddin kasta ee Jamhuuriyadda Federaalka ah wuxuu xaq u leeyahay in uu qabto jago kasta oo ciidammada amniga iyo difaaca dalka, marka uu buuxiyo shuruudaha qorista ciidammada, iyadoo ka mid noqoshadooda loo simanyahay.
(4) Xubnaha hay’adaha amniga iyo difaaca waa in lagu magacaabaa laguna dalacsiiyaa qaab ku saleysan aqoon, mudnaan, mutaysi, iyo tartan furan.
(5) Dawladda Federaalka waxaa waajib ka saaranyahay in ay hubiso in habraacyada la xiriira shaqaaleynta, tababbarka, iyo adeegsiga ciidammada amniga lagu saleeyo matalaad caddaalad ah oo ay ka dhex muuqdaan dhammaan degaannada dalka.
(6) Xukuumadda federaalka ayaa dejinaysa siyaasadda guud, halbeegyada, qaabdhismeedka, qorista, xilalka, dallacsiinta, dhimista darajada, howlgabnimada iyo habraacyada kale ee dhammaan hay’adaha amniga iyo difaaca qaranka, waxaana lagu soo saarayaa xeer uu ansixiyo Baarlamaanka Federaalka Soomaaliya.
No translation available yet in English.
Plain-Language Explanation
Not available.
