Dastuurka JFS (A Citizen’s Initiative)
Home Constitution Blog Authors
CUTUBKA 14: DIFAACA IYO AMNIGA QARANKA
(CHAPTER 14: NATIONAL DEFENCE AND SECURITY)
Somali (Original)

Qodobka 181aad: Ciidanka Xoogga Dalka

(1) Dastuurkan wuxuu dhisay Ciidanka Xoogga Dalka oo ka kooban: (a) Ciidanka Dhulka; (b) Ciidanka Badda; iyo (c) Ciidanka Cirka.

(2) Ciidanka Xoogga Dalka wuxuu u xilsaaranyahay: (a) Difaacidda dalka; (b) Ilaalinta gobannimada, madaxbannaanida dalka, midnimada iyo wadajirka dhuleed ee Jamhuuriyadda; (c) Badbaadinta iyo gurmadka dadka ee xaaladaha masiibooyinka dabiiciga; (d) Gacansiinta booliiska marka ay jiraan xaalado degdeg ah ama xaalad dagaal si loo ilaaliyo amniga iyo hantida dadka si waafaqsan Dastuurka iyo xeerarka Jamhuuriyadda Federaalka Soomaaliya. Waxaana isticmaalkooda oggolaanaya Golaha Amniga Qaranka oo si joogto ah ugu warbixinaya Baarlamaanka Federaalka Soomaaliya.

(3) Dawladda Federaalka oo keliya ayaa awood u leh dhismaha ciidanka xoogga dalka, hoggaaminta, tababbarka iyo maamulkiisaba.

(4) Ciidanka Xoogga Dalka waxaa loo adeegsan karaa gudaha dalka keliya marka ay jiraan xaalado degdeg ah ama xaaladaha kale ee lagu xusay Dastuurka, iyadoo lagu saleynayo go‘aan gaar ah oo Baarlamaanku ansixiyo.

English

No translation available yet in English.

Plain-Language Explanation

Somali
Ciidanka Xoogga Dalka wuxuu ka kooban yahay saddex qaybood: Ciidanka Dhulka, Ciidanka Badda iyo Ciidanka Cirka. Waajibaadkiisu waa difaacidda dalka, ilaalinta gobannimada, madaxabannaanida, midnimada iyo wadajirka dhuleed ee Jamhuuriyadda, iyo badbaadinta iyo u gurmashada dadka marka ay dhacaan masiibooyin dabiici ah. Waxa kale oo uu Booliiska ka caawin karaa xaaladaha degdegga ah ama xilliyada dagaalka si loo ilaaliyo amniga iyo hantida shacabka, iyadoo la raacayo Dastuurka iyo sharciyada dalka. Adeegsiga ciidanka ee hawlahaas waxaa oggolaanaya Golaha Amniga Qaranka, kaas oo si joogto ah warbixin uga siinaya Baarlamaanka Federaalka. Dowladda Federaalka oo keliya ayaa awood u leh dhismaha, hoggaaminta, tababarka iyo maamulka Ciidanka Xoogga Dalka. Ciidanka waxaa gudaha dalka loo adeegsan karaa oo keliya xaaladaha degdegga ah ama xaaladaha kale ee Dastuurku oggol yahay, iyadoo loo baahan yahay go’aan gaar ah oo uu Baarlamaanka Federaalku ansixiyo.
English

Not available.

Questions & Comments (0)