Qodobka 167aad: Mabaadi’da Maaliyadda Guud
Si loo xaqiijiyo nidaam maaliyadeed oo hufan, caddaalad ah, isla markaana waafaqsan qaabdhismeedka federaalka, dhaqangelinta siyaasadda iyo nidaamka maaliyadeed ee dalka waxaa hagaya mabaadi’da guud ee soo socda:
(1) Qaybinta awoodaha maaliyadeed iyo canshuuraha waa in lagu saleeyaa nidaam maaliyadeed oo dheellitiraya heerarka kala duwan ee dawladda, si loo xaqiijiyo in adeegyada iyo dakhliga loo qaybiyo si waafaqsan baahida iyo awoodda fulinta.
(2) Mas’uuliyadda bixinta adeegyada iyo fulinta hawlaha maaliyadeed waa in lagu meeleeyaa hay’adda dawladda ee ugu dhow shacabka.
(3) Muwaaddiniinta dhammaan gobollada iyo degaannada dalka waxay xaq u leeyihiin adeegyo iyo fursado maaliyadeed oo siman, iyadoo aan loogu kala eexanayn degaan ama xaalad dhaqaale.
(4) Qorsheyaasha iyo siyaasadaha maaliyadeed waa in lagu saleeyaa mabda’a joogteynta xasilloonida maaliyadeed ee jiilalka mustaqbalka, si aysan u dhaxlin culeys maaliyadeed oo ka baxsan awooddooda dhaqaale.
(5) Kala duwanaanshaha awoodaha, khayraadka iyo mas’uuliyadaha maaliyadeed ee u dhexeeya heerarka dawladeed waa in lagu saleeyaa mabda’a federaalnimada, sinnaanta iyo hufnaanta, iyadoo la oggolaanayo in dawlad goboleedyadu yeeshaan awoodo iyo xayndaabyo maaliyadeed oo ku habboon xaaladdooda dhaqaale iyo bulsho, si waafaqsan Dastuurka iyo xeerarka federaalka.
(6) Heer kasta oo dawladeed waa inuu qaataa mas’uuliyadda maaliyadeed ee ka dhalata awoodaha Dastuurku u asteeyey.
(7) Heer kasta oo dawladeed wuxuu awoodihiisa maaliyadeed u adeegsanayaa si waafaqsan Dastuurka iyo xeerarka dalka, isagoo ilaalinaya xasilloonida dhaqaalaha iyo horumar waara.
(8) Heer kasta oo dawladeed wuxuu mas’uul ka yahay kharashaadka hawlaha uu Dastuurka Federaalka u xilsaaray.
(9) Haddii hawl federaal loo wareejiyo dawlad goboleed, kharashka lagu fulinayo waxaa bixinaya heerka dawladda ee hawsha leh, haddii aan si kale lagu heshiin.
(10) Dhammaan hannaanka maaliyadeed ee dalka waa in uu ku dhisanyahay nidaamka Qasnadda Mideysan ee Dawladda.
No translation available yet in English.
Plain-Language Explanation
Not available.
