(1) Madaxweynaha Jamhuuriyadda Federaalka Soomaaliya waxaa kulan wadajir ah ku dooranaya labada gole ee Baarlamaanka Federaalka.

(2) Ugu yaraan saddex meelood labo meel (2/3) tirada guud ee xubnaha gole walba ee Baarlamaanka Federaalku waa inay joogaan u codaynta doorashada Madaxweynaha Jamhuuriyadda Federaalka.

(3) Musharraxa Madaxweynaha Jamhuuriyadda Federaalka Soomaaliya waxaa musharraxnimadiisa soojeedin kara saddexda xisbi siyaasadeed ee ka mid ka ah xisbiyada qaran ee dalka, kuwaas oo helay tirada ugu badan ee xildhibaannada labada gole ee Baarlamaanka Federaalka Soomaaliya, wuxuuna barnaamijkiisa ku soo bandhigayaa kulanka wadajirka ah ee labada gole ee Baarlamaanka Federaalka.

(4) Marka loo codaynayo doorashada Madaxweynaha Jamhuuriyadda xildhibaan kasta wuxuu leeyahay hal cod.

(5) Labada gole ee Baarlamaanka Federaalka waxay ku dooranayaan Madaxweynaha Jamhuuriyadda hab codayn qarsoodi ah, iyadoo la raacayo habraaca soo socda: (a) Wareegga koowaad musharraxii hela aqlabiyad boqolkiiba konton iyo haldheeri (50%+1) ah tirada guud ee xubnaha labada gole ee Baarlamaanka Federaalka Soomaaliya ayaa ku guulaysanaya xilka Madaxweynaha Jamhuuriyadda Federaalka Soomaaliya. Haddii la waayo musharrax guulaysta, waxaa loo gudbayaa wareeg labaad. (b) Wareegga labaad waxaa u soo gudbaya labada musharrax ee ugu codka badan wareeggii koowaad, haddiise uu jiro musharrax saddexaad oo helay codad barbardhac ah wuxuu xaq u leeyahay in uu ka gaybgalo una gudbo tartanka doorashada wareegga labaad. Musharraxii hela cod aqlabiyad boqolkiiba konton iyo haldheeri (50%+1) ah tirada guud ee xubnaha labada gole ayaa ku guuleysanaya in uu noqdo Madaxweynaha Jamhuuriyadda Federaalka Soomaaliya.